गोर गण समाजेरो धार्मिक, सांस्कृतिक उन्माद : डाॅ.वसंत भा.राठोड, किनवट.

September 21, 2021 admin 0 Comments

आजेर घडीन गोर गण समाजेम धार्मिक, सांस्कृतिक उन्माद घणोज जोर पकडलिदोच. जेरो वर्णन गोर भाषाशास्त्रज्ञ तथा साहित्यिक भीमणीपुत्र नायक काकाजी आजेर काकडवांदाम आचे तराती करमेलोच .
आधुनिक धार्मिक उन्मादेमांयी गोर समाज बळी पडगो. आभासी अदृश्य देव पुजे भजेवाळ, कनाई तरी पुजे भजेवाळ ,कनाईच न पुजे भजेवाळ आसे तीन गट वा समुह समाजेम निर्माण वेगेच बणगेच
हानू देकेन चाले तो ऐ तीन गट कोणी तो तीन जाते समाजेम तयार वेगीच. ऐ तीन जाते एक मेकेन कमी समजन पाणीम देकरीच.
निसर्गपुजक गोर समाज शहरी, अर्धशहरी, ग्रामवासी आणि निखळ तांडावसी रेगो नी वेगो. जसो संपर्क, सहवास मळो वसोच वेन बेसगो.
वसोज मांसाहारी व शाकाहारी (माळकरी), पुराण, मुर्दाड पोथी, ग्रंथ वाचेवाळ अन वोमांयी सप्ता, हप्ता करेवाळ अन दुसर कतो ये थोतांड वातेम वेळ न घालता कामेन कर्तव्यनिष्ठेन महत्त्व देयेवाळ साधा भोळे लोक इंदेर मांयी सदा दी गट देकेन मळच.
लकेपडेवाळेर फुशारकी नाळी,उनेर वागणूक, अवतार आणि तांडेमांयीर कष्टकरेवाळो समाज इनेर मांयी सदा दी धुर्या , भिते वेगीच पडगीच.
झांझ, डपडा, थाळी, नंगाराप हातेम तलवार, भाला, बरची ,लाठी, ठोळी लेन नाचे कुदेवाळो समाज आज बदलते युगेम कंबरतोडी, डाॅल्बी, मानमोडी, डिस्को, वाकडी, डुबकमली, काबरी, तर्रारा, घल्डो(नागीण)डान्स आडे उंदे पडन नाचे कुदेन लागगो.
धार्मिक, सांस्कृतिक धकाधकीम देकादेकी हामारी बाई बापडी आभासी ओळी सोळी मुर्तीन देव समजन वोपर तर्रा तर्रार पालो ढाकरी, गावडी बळद खाव जकोण खडेन वकोल्डीपरती वोकडन जुडी बांधन वोती आभासी देवेप पाणी छणकरीच. आभासी देवेर पंचारती करन धणीर मुंडो चांणीम देकरीच. आसो नाळी, नाळी छंद देकेन, सांमळेन मळरोच.
तांडा गण समाजेम मंदिर ठकाण छेयी हानू भीमणीपुत्र नायकेर केणो छ. उनेर विचारेती मं सहमत छू.
आज चाळीस, पंचास साल लार गेतो तांडा समुहेम एकही मंदिर कोनी वेते.
बंगला इज सेन मातो टेकेरो, भजे पुजेरो, धरतीन (पंचमहाभूत) धोकेर, घीयेरो भोग लगाडन नवंण करेर एकमात्र ठकाण वेतो.
पणं आजेर घडीन तांडा गोर गणेम मंदिर प्रक्रिया, वाना वानार आभासी अदृश्य देव घणे जोर पकडलिदेच. संत सेवालाल महाराज आणि जगदंबी याडीर देवळ सर्रास तांडेम बांधरेच. पण सेवालाल बापू जे कोच ” कोयी केनी भजो पुजो मत ” आसे कैक अनमोल तत्वज्ञान दिनो वोपर धेन मात्र छेयी.
याडी जगदंबीर देवळेन तो बकरा काटन खायेर एक प्रमाणित मुख्य केंद्र बणालिदेच. येन कच धार्मिक, सांस्कृतिक उन्माद…! आभासी देवी देवतार नामेप आधुनिक मंदिर प्रक्रियाम चंगळ, मंगळ चालतो दकारोच.
निसर्गपुजक समाज चांदा, सुर्या, झाडे, माडेर, धरतीन मनोभावे नवंण करेवाळो गोर समाज वाना किनार आभासी देवेर लार लागन पकोच घल्डातो दकारोच.
गोर समाजेर धार्मिक, सांस्कृतिक सत्ता, व्यवस्था आतरी मजबूत रेयेर बाद भी प्रचंड आसो सांस्कृतिकरण वेगो . कैक सालेती हाम वोमायी डाबकडुबली करेन लागगे. येरो कारण हामार वाचन, लेखन, सांस्कृतिक, साहित्य मजबूत छेयी. जे लकरेच वोन वाचणो छेयी. कु करण साहित्यिक, सांस्कृतिक व्यवस्था मजबूत विय.
सारांश : उपरेर से वाते धेनेम लिदे तो. नाळी नाळी वगम, वाते, विषमता देकेन मळच. गोर समाजेम धार्मिक व सांस्कृतिक उन्मादेर कारण उपरेर संपूर्ण मतभेद, मनभेदे मांयीती दकावच.
समाजेम कांयी आदे मातेर लोक आंबा कतो सोटा, पुर्व कतो पश्चिम एके विचारेती एकजाग आयेनी, समजदारपणो दकाळेनी. जेर सारू सोतार वाचन, लेखन , साहित्यिक, सांस्कृतिक चळवळ, संघटन शक्ती, हालचाल मजबूत आणि बलशाली वेणो गरजेर छ.
आचो मस्तक केरी हस्तक वेयेनी. वो मस्तकेन आची पुस्तकेर जोड लागच. आपण गोर गणेर गीत, संगीत, लडी, वाजणा, साकी, साक्तर, लेंगी, ढावलो, हिंयास खूप आचे अर्थपूर्ण छ. वोन कमी न समजता वोमांयीर मकरंद, गुलकंद चाकणो गरजेर छ. ऐ से वाते शिवाय गोर गण समाजेर स्वतंत्र अस्तित्व निर्माण वेयेवाळो छेयी. आपण से सांस्कृतिक, साहित्यिक आणि धार्मिक दृष्टीती एक नी समंजस वियाँ आस आसा छ.
धन्यवाद !