प्रेस संपादक व पत्रकार सेवा संघाच्या वतीने कर्तृत्ववान महिला पोलिसांचा सन्मान* *पिंपरी चिंचवड शाखेच्या वतीने केले होते आयोजन

पिंपरी चिंचवड : प्रेस संपादक व पत्रकार सेवा संघ, पिंपरी चिंचवडच्या वतीने कर्तृत्ववान महिला पोलिसांचा यथोचित सन्मान करण्यात आला. नवरात्रीचे औचित्य साधून या सन्मान सोहळ्याचे आयोजन करण्यात आले होते.
पोलीस व वाहतूक क्षेत्रातील महिला रस्त्यावर रक्षणासाठी उतरतात आणि अडी अडचणीवर मात करत पुरुषांच्या खांद्याला खांदा लावून आपले कर्तृत्व बजावत असतात. यासाठी वेळेचे बंधन न पाळता जनतेच्या संरक्षणाची जोखीम सांभाळताना घर, शिवाय जनता यांच्यामधील कसरत, समतोल सांभाळत आपले योगदान देतात. त्यांच्या या कामाचे श्रेय त्यांना मिळावे, त्यांचा गौरव व्हावा, त्यांना सन्मान मिळावा या उद्देशाने प्रेस संपादक व पत्रकार सेवा संघ पिंपरी चिंचवडच्या वतीने पोलीस तसेच वाहतूक क्षेत्रातील कर्तृत्ववान महिलांचा सन्मान करण्यात आला.

यावेळी प्रेस संपादक व पत्रकार सेवा संघाचे पश्चिम महाराष्ट्र संघटक श्रीनिवास माने, शहराध्यक्ष संतोष रणसिंग, महिला शहराध्यक्षा सौ मंदा बनसोडे, शहनाज कुरणे आदी पदाधिकारी व सदस्य उपस्थित होते. पिंपरी चिंचवड शाखेच्या पदाधिकाऱ्यानी हा स्तुत्य कार्यक्रम हाती घेतल्यामुळे संघाचे संस्थापक अध्यक्ष डी. टी. आंबेगावे, राज्य, विभाग, जिल्हा व तालुका पदाधिकाऱ्यांनी अभिनंदन केले आहे.